¿Qué facemos? O noso proxecto

O proxecto que desenvolvemos dende o ano 2005 consiste na mellora das condicións de vida de menores discapacitados na zona de Bamenda, ó noroeste de Camerún. Nestes momentos dispoñemos dunha casa de acollida temporal na que conviven 30 nenas con algún tipo de discapacidade física e ás que se lles proporciona educación e asistencia sanitaria, esta última na medida en que se dispón de medios.

 Durante o período de vacacións tratamos de que as nenas con minusvalías non-severas retornen ás súas casas e sexan atendidas polas súas familias como forma de integración das mesmas na sociedade. A filosofía da casa de acollida non é recoller a todas aquelas rapazas ás que ninguén quere, senón que sexa un centro de educación para a poboación da zona no que aprendan que unha discapacidade, xa sexa física ou psíquica, non debe supoñer para quen a sofre a súa exclusión total. Un dos principais obxectivos de Cero negativo para o futuro é a educación no seo das familias, co fin de que estas se fagan cargo daqueles menores con discapacidades leves, reservando deste modo a casa de acollida para aqueles casos máis graves e que necesitan unha atención especial da que non dispoñen as propias familias.